28/03/2025
Մարտի 26-ին ՀՀ-ում Անտառագետի, Ջրաբանի, Օդերևութաբանի օրերի կապակցությամբ, ՇՄՆ «Հիդրոօդերևութաբանության և մոնիթորինգի կենտրոն» ՊՈԱԿ-ի Օրհուս կենտրոնում հյուրընկալվել էին «Ապահով անկյուն» ՀԿ-ի երիտասարդական խումբը՝ ՀԿ-ի նախագահի ուղեկցությամբ։
Երիտասարդ այցելուները նախ ծանոթացել են ՊՈԱԿ-ի Օրհուս կենտրոնի գործունեությանը, ապա՝ անտառաբանի, ջրաբանի և օդերևութաբանի օրերի թեմաներին, դրանց կարևորությանը։
Այսպիսի բնապահպանական տոները հնարավորություն են տալիս բարձրացնելու հանրության իրազեկվածությունը էկոլոգիական խնդիրների մասին, ինչպես նաև խթանում են համատեղ գործողությունների իրականացումը։
Մասնակիցները տեղեկատվություն են ստացել նաև Հայաստանի ջրային էկոհամակարգերի, այդ թվում՝ Սևանա լճի պահպանության և գետերի աղտոտվածության խնդիրների, ինչպես նաև մթնոլորտային օդի աղտոտվածության խնդիրների վերաբերյալ։
Միջոցառման ավարտին երիտասարդները իրենց ստացած գիտելիքները ամփոփել են «Kahoot» առցանց ուսուցողական խաղի միջոցով և շեշտել նման միջոցառումների կարևորության մասին, քանի որ ստացած գիտելիքները կիրառելի են թե՛ առօրյայում, թե՛ ուսման և աշխատանքի ընթացքում։
