21/03/2025
Հարգելի՛ անտառագետներ և անտառային ոլորտի աշխատակիցներ,
Սրտանց շնորհավորում եմ ձեզ Անտառների միջազգային օրվա և ՀՀ-ում անտառագետի օրվա կապակցությամբ։ Ձեր ամենօրյա նվիրումով և պատասխանատու աշխատանքով դուք կանգնած եք բնության պահպանության առաջնագծում՝ մշտապես պայքարելով էկոլոգիական հավասարակշռության պահպանման համար։
Անտառները ոչ միայն կենսաբազմազանության ապաստան են, այլ նաև մեր մոլորակի կյանքի հիմնական օղակներից են։
Այս տարի Անտառների միջազգային օրը նշվում է «Անտառները և պարենամթերքը» կարգախոսի ներքո։ Անտառները առանցքային դեր են խաղում պարենային անվտանգության ապահովման գործում՝ տրամադրելով բազմազան բնական պաշարներ՝ հատապտուղներ, ուտելի սնկեր և այլն։
Բացի այդ, անտառները նպաստում են գյուղատնտեսության զարգացմանը՝ կարգավորելով կլիման, պահպանելով ջրային ռեսուրսները և ապահովելով հողերի բերրիությունը։
Անտառային ոլորտի սիրելի աշխատակիցներ, անտառների պահպանության ձեր մասնագիտական գիտելիքներն ու գործնական մոտեցումները առավել քան երբևէ կարևոր են՝ հատկապես կլիմայական փոփոխությունների և անտառային տարածքների կրճատման պայմաններում։
Դուք՝ որպես ոլորտի նվիրյալ մասնագետներ, ամեն օր ձեր աշխատանքով պաշտպանում և վերականգնում եք այս անփոխարինելի բնական ռեսուրսը՝ ձևավորելով անվտանգ և կայուն միջավայր ներկա և ապագա սերունդների համար։
Հատուկ շնորհակալություն «Հայհիդրոմետ» ՊՈԱԿ անտառների և կենսաբազմազանության մոնիթորինգի ծառայության աշխատակիցներին՝ անտառների ազգային գույքագրման և մոնիթորինգի գործընթացներում իրենց կարևոր ներդրման համար։ Այս աշխատանքը կարևոր նշանակություն ունի մեր երկրի բնական հարստության պահպանման և կայուն կառավարման համար։
Թող այս օրը լինի ոչ միայն շնորհակալության, այլ նաև ոգեշնչման նոր սկիզբ՝ շարունակելու ձեր կարևոր առաքելությունը։
Մաղթում եմ ձեզ նորանոր ձեռքբերումներ, ստեղծագործական եռանդ և ուժեղ կամք՝ մեր բնական հարստությունները գալիք սերունդներին փոխանցելու և պահպանելու գործում։
Շնորհավոր տոնդ, անտառագետ։
Թող ձեր ջանքերը միշտ պսակվեն հաջողությամբ։
