29/10/2024
Երիտասարդ հետազոտողները նամակով տեղեկացրել էին, որ իրենք իրականացրել են շրջակա միջավայրի պահպանության խնդիրների մասին երիտասարադների իրազեկվածության վերաբերյալ հետազոտություններ և ներկայումս իրականացնում են Երևան քաղաքի օդի աղտոտվածության խնդրի ուսումնասիրություն և այս խնդրի մասին երիտասարդների իրազեկվածության և տեղեկատվության աղբյուրների մասին հետազոտություն։
Այցի նպատակն էր ծանոթանալու օդի աղտոտվածության մոնիթորինգի գործընթացին, ինչպես նաև Օրհուսի կոնվենցիայի «Աղտոտիչների արտանետումների և տեղափոխման ռեգիստրի մասին» արձանագրությանը, քանի որ այն նույնպես առնչվում էր իրենց հետազոտությանը։
Այցելության ընթացքում լաբորատորիայի մասնագետները ներկայացրեցին, թե ինչպես են մթնոլորտային օդի նմուշները հավաքվում տարբեր դիտակետերից և ինչպիսի սարքավորումներ են օգտագործվում դրանց լաբորատոր չափման համար։
Մասնագետները նաև տեղեկացրեցին, թե ինչ աղբյուրներից կարող են ստանալ օդի աղտոտվածության վերաբերյալ տվյալները։
Օրհուս կենտրոնի համակարգողը ներկայացրեց Օրհուսի կոնվենցիայի «Աղտոտիչների արտանետումների և տեղափոխման ռեգիստրի մասին» արձանագրության վերաբերյալ ընդհանուր տեղեկատվություն, արձանագրության դրույթների իրականացման այլ երկրների փորձը ։
Երիտասարդական հետազոտական թիմի անդամները «Հայհիդրոմետ» ՊՈԱԿ-ի փոխտնօրեն Գ․ Շահնազարյանի, մթնոլորտային օդի որակի մոնիթորինգի ծառայության պետ Գ․ Հակոբյանի և Օրհուս կենտրոնի համակարգող Ս․ Այվազյանի հետ քննարկեցին բնապահպանական հիմնախնդիրները, ուղղեցին իրենց հուզող հարցերը, ինչպես նաև կիսվեցին իրենց հետազոտությունների արդյունքներով և ապագա ծրագրերով։
