27/09/2024
Ծովերի համաշխարհային օրը ՄԱԿ-ի համակարգում միջազգային տոներից մեկն է։ Այդ օրը նշվում է 1978 թվականից՝ Միջկառավարական ծովային խորհրդատվական կազմակերպության ասամբլեայի 10-րդ նստաշրջանի որոշմամբ։
Մինչև 1980 թվականը այն նշվում էր մարտի 17-ին, իսկ հետո որոշվեց ամսաթիվը տեղափոխել սեպտեմբերի վերջին ամբողջական շաբաթվա օրերից մեկը։
Ծովերի համաշխարհային օրվա նպատակն է միջազգային հանրության ուշադրությունը հրավիրել ծովերին և օվկիանոսներին անդառնալի վնաս հասցնող չափից շատ ձկնորսության, ջրավազանների աղտոտման և գլոբալ տաքացման, ինչպես նաև գալիք սերունդների համար ծովերի կենսաբանական, բնական և ռեկրեացիոն ռեսուրսների պահպանման ընթացիկ խնդիրներին։
Ամենակարևոր խնդիրներն են ծովային տրանսպորտի էկոլոգիական անվտանգության բարձրացումը, ծովային միջավայրի, մասնավորապես նավթով աղտոտման կանխումը, կենսաբանական ռեսուրսների պահպանումը և որսագողության դեմ պայքարը։
Ըստ ՄԱԿ-ի տվյալների՝ վերջին 100 տարվա ընթացքում որոշ ձկնատեսակների՝ թունայի, ձողաձկան և մարլինի 90% -ը որսացել են։ Ամեն տարի մոտ 21 մլն բարել նավթ է թափվում ծովեր և օվկիանոսներ։ Սինթետիկ թափոնները, որոնք լցվում են խոշոր ջրավազանները, պատճառ են հանդիսանում տարեկան մեկ միլիոն ծովային թռչունների և 100000 ծովային կաթնասունների ոչնչացման: Գլոբալ տաքացման պատճառով վերջին 100 տարվա ընթացքում մոլորակի խոշոր ջրավազաններում ջրի մակարդակը բարձրացել է 10-25 սանտիմետրով:
Բացի այդ, բեռների փոխադրումը ծովային տրանսպորտով, որպես ապրանքների միջազգային փոխադրման ամենաարդյունավետ և ծախսարդյունավետ միջոց, խաթարում է նաև ծովերի և օվկիանոսների էկոհամակարգերը։ Չէ՞ որ համաշխարհային առևտրի 80%-ն իրականացվում է ծովային տրանսպորտով։ Հետևաբար, անվտանգ և արդյունավետ միջազգային բեռնափոխադրումների զարգացումը «կանաչ» տնտեսության և կայուն զարգացման ոլորտում ապագա նախագծերի բանալին է:
Այս բոլոր հարցերի բարձրացումը առաջնահերթություն է Միջկառավարական ծովային խորհրդատվական կազմակերպության աշխատանքներում։ Էներգաարդյունավետություն, նոր տեխնոլոգիաների և նորարարությունների ներդրում, անձնակազմի վերապատրաստում, ծովային անվտանգություն, նավագնացության կառավարում և ենթակառուցվածքների զարգացում` այս բոլոր խնդիրները պահանջում են համաշխարհային ստանդարտացում:
«Միջոցառումների օրացույց» նախագծի համաձայն՝ Ծովերի համաշխարհային օրը, որն ամեն տարի նվիրված է որոշակի արդիական բնապահպանական թեմայի, աշխարհի տարբեր երկրներում ուղեկցվում է բնապահպանական և կրթական տարբեր միջոցառումներով, բնապահպանական ակցիաներով և հանրահավաքներով։ Այս տարվա թեման էր՝ «Նավարկություն դեպի ապագա․ առաջին հերթին՝ անվտանգությունը»:
