14/08/2024
Սևանա լիճ թափվող գետերի վրա գործող «Հիդրոօդերևութաբանության և մոնիթորինգի կենտրոն» ՊՈԱԿ-ի հիդրոլոգիական դիտակետերը նոր ջրաչափական գործիքներով աապահովելու նպատակով EU4Sevan ծրագրի կողմից ձեռք է բերվել գերմանական OTT ապրանքանիշի հինգ ջրաչափական պտուտանի հավաքածու։
Օգոստոսի 13-ին «Հայհիդրոմետ» ՊՈԱԿ-ում կայացած հանդիպման ժամանակ EU4Sevan ծրագրի թիմի ղեկավար Ալեքսանդր Առաքելյանը (Գերմանական միջազգային համագործակցության ընկերություն, GIZ) հանձնեց վերոնշյալ ջրաչափական գործիքները ՊՈԱԿ-ի տնօրինությանը։
«Հայհդրոմետ» ՊՈԱԿ-ի տնօրեն Լևոն Ազիզյանը շնորհակալություն հայտնեց ծրագրին շարունակական համագործակցության և աջակցության համար։ Նա նշեց, որ այս նոր գործիքները նպաստելու են Սևանա լիճ թափվող գետերի ջրի ելքերի տվյալների արժանահավատության բարձրացմանը, ինչն իր հերթին կաջակցի լճի ջրային հաշվեկշռի ու կլիմայի փոփոխության՝ ջրային ռեսուրսների վրա ազդեցության գնահատականների ճշգրտության բարելավմանը։
«Սևանա լճի շրջակա միջավայրի պահպանություն» (EU4Sevan) ծրագիրը համատեղ ֆինանսավորվում է Եվրոպական Միության և Գերմանիայի դաշնային հանրապետության տնտեսական համագործակցության և զարգացման նախարարության կողմից։ Այն «ԵՄ-ը հանուն էներգաարդյունավետության և շրջակա միջավայրի» ԵՄ գործողության և ԳԴՀ ՏՀԶՆ-ի կողմից ֆինանսավորվող «ECOServe» ծրագրի մաս է կազմում։ Ծրագիրն իրականացվում է Գերմանական միջազգային համագործակցության ընկերության (GIZ) և ՄԱԿ-ի զարգացման ծրագրի կողմից:
