25/06/2024
Ինչպե՞ս է ջրի մոտ գտնվելն ազդում մարդու ուղեղի և մարմնի վրա: Ծովային կենսաբան Վիլիս Նիկըլսը իր «Ближе к воде. Удивительные факты о том, как вода может изменить вашу жизнь» գրքում պատասխանում է այս և այլ հարցերի՝ բացահայտելով ջրի մեջ կամ նույնիսկ դրա շրջակայքում գտնվելու բոլոր առավելությունները, օգտագործելով նյարդաբանության և կենսաբանության մշակումները և տարբեր մարդկանց փորձը՝ առաջատար մարզիկներ, լավագույն գիտնականներ, նախկին զինծառայողներ և տաղանդավոր ստեղծագործողներ: Մարդիկ միշտ ձգտել են մոտ լինել ջրին, նրա հետ խորը հուզական կապ են զգում և բնազդաբար ձգտում են նրան մոտ լինել։ Մասնագետների գնահատմամբ՝ մոլորակի բնակչության 80%-ն ապրում է օվկիանոսների, լճերի կամ գետերի ափերից ոչ ավելի, քան հարյուր կիլոմետր հեռավորության վրա:
Ջուրը ոգեշնչում է մեզ: Մենք սիրում ենք լսել նրա ձայնը, շնչել նրա բույրը, խաղալ նրա մեջ, զբոսնել նրա շուրջը, պատկերել նրան կտավի վրա, զբաղվել սերֆինգով, լողալ և ձուկ որսալ, գրել նրա մասին, լուսանկարել և երկար ժամանակ նրան պահել հիշողության մեջ ՝ քայլելով ջրամբարի ափի երկայնքով: Չիլիացի բանաստեղծ Պաբլո Ներուդան ասել է ՝ «Ինձ ծով է պետք, քանի որ այն ինձ սովորեցնում է»։ Հետազոտությունները ցույց են տվել, որ մարդիկ ովքեր ապրում են ջրից 2 կմ ոչ հեռու, բնութագրվում են կյանքի բավարարվածության բարձր մակարդակով, քան ջրից հեռու ապրող մարդիկ։ Բացի դրանից, բաց ջրային տարածությունը դրական է ազդում մարդու ինքնահարգանքի և տրամադրության վրա։
Տեխնիկական առաջընթացի շնորհիվ մարդու միտքը ուսումնասիրելու և հասկանալու մեր հնարավորությունները զգալիորեն ընդլայնվել են՝ հանգեցնելով նոր գաղափարների աճին՝ կապված մարդու ընկալման, հույզերի, կարեկցանքի, ստեղծագործականության, առողջության, բուժման և ջրի հետ հարաբերությունների հետ: Մի քանի տարի առաջ այս կապի համար (մարդու և ջրի միջև) ստեղծվեց մի անուն՝ Կապույտ միտք (գիտակցություն): Դա ինչ-որ չափով մեդիտատիվ վիճակ է, որը բնութագրվում է հանգստությամբ, խաղաղությամբ, բնության հետ միասնության զգացումով, երջանկության զգացումով և կյանքից բավարարվածությամբ: Նրա հիմքում ընկած է ջուրը։ Մի դարաշրջանում, երբ մարդու կյանքը լի է սթրեսներով, աճող անհանգստությամբ, տեխնոլոգիայով, կարիերայի խնդիրներով և հիվանդանոցային հաշիվներով, երբ մենք ավելի ու ավելի ենք հեռանում բնությունից, և անձնական կյանքի իրական անձեռնմխելիությունը դառնում է առավել հազվադեպ երևույթ, չափազանց օգտակար կարող է լինել թոթափել այդ ամենը ձեզանից և անջատվել։
